పసికందుల సజీవ దహనంపై అడ్వకేట్ వినోద్ హిందుస్థానీ ఫిర్యాదు
న్యూ ఢిల్లీ: తెలంగాణలోని ప్రభుత్వ ఆసుపత్రుల్లో నెలకొన్న దయనీయ పరిస్థితులు, పాలకుల వ్యవస్థాగత నిర్లక్ష్యంపై జాతీయ మానవ హక్కుల కమిషన్ (NHRC) తీవ్రస్థాయిలో స్పందించింది. వైద్య రంగానికి బడ్జెట్ కేటాయింపుల్లో ప్రభుత్వ నిర్లక్ష్యం, అధికారుల బాధ్యతారాహిత్యం కారణంగా నిరుపేద రోగుల ప్రాణాలకు రక్షణ లేకుండా పోయిందంటూ దాఖలైన పిటిషన్‌ను విచారణకు స్వీకరించి అధికారికంగా కేసు నమోదు చేసింది. రాష్ట్రంలోని ప్రభుత్వ దవాఖానాల్లో పసికందుల మరణాలు, కుప్పకూలుతున్న భవనాలు, కనీస సౌకర్యాల లేమిపై హైకోర్టు న్యాయవాది వినోద్ హిందుస్థానీ సమగ్ర ఆధారాలతో సమర్పించిన ఫిర్యాదుపై కమిషన్ ఈ చర్య తీసుకుంది.
ఆదిలాబాద్ రిమ్స్‌లోని ప్రత్యేక నవజాత శిశు సంరక్షణ విభాగం (SNCU)లో ఏసీల నిర్వహణ లోపం, షార్ట్ సర్క్యూట్‌తో అగ్నిప్రమాదం జరిగి ముగ్గురు పసికందులు సజీవ దహనమైన ఘటన ప్రభుత్వ క్రిమినల్ నిర్లక్ష్యానికి పరాకాష్ట అని పిటిషన్‌లో పేర్కొన్నారు. 750 పడకల ఆసుపత్రికి కేవలం ముగ్గురు ఎలక్ట్రీషియన్లు మాత్రమే ఉండటం వ్యవస్థాగత వైఫల్యాన్ని స్పష్టం చేస్తోందని ప్రస్తావించారు. అటు వరంగల్ ఎంజీఎంలోనూ తగినన్ని రేడియంట్ వార్మర్లు, ఇంక్యుబేటర్లు లేక ఒకే వార్మర్‌లో ఇద్దరు ముగ్గురు శిశువులకు చికిత్స అందించాల్సిన దుస్థితి నెలకొంది. వార్డుల్లో పెచ్చులూడి రోగుల నెత్తిన పడుతున్నా మరమ్మతులు చేపట్టకపోవడం, ఐసీయూల్లోకి సైతం ఎలుకలు చేరి రోగులను కొరకడం, ఆవరణలో కుక్కల సంచారం రోగుల ప్రాణాలకు ముప్పు తెస్తున్నాయని కమిషన్ దృష్టికి తీసుకెళ్లారు. పడకలు చాలక గర్భిణులు, వృద్ధులు నేలపైనే పడుకుని చికిత్స పొందుతున్న అమానవీయ పరిస్థితులు రాజ్యాంగం కల్పించిన జీవించే హక్కు (ఆర్టికల్ 21) ఉల్లంఘన కిందకే వస్తాయని వివరించారు.
ఈ వివరాలను పరిగణనలోకి తీసుకున్న ఎన్‌హెచ్‌ఆర్‌సీ (కేసు డైరీ 112620/CR/2026) కేసును నమోదు చేసింది. ఈ ఉదంతంపై రాష్ట్ర ప్రభుత్వ ప్రధాన కార్యదర్శి (CS), వైద్యారోగ్య శాఖ ముఖ్య కార్యదర్శికి త్వరలోనే నోటీసులు జారీ చేసి సమగ్ర విచారణ నివేదిక కోరనుంది. రాష్ట్రవ్యాప్తంగా ఉన్న అన్ని ప్రభుత్వ వైద్య కళాశాలలు, జిల్లా ఆసుపత్రుల్లో వెంటనే థర్డ్ పార్టీ ఎలక్ట్రికల్, ఫైర్ మరియు స్ట్రక్చరల్ ఆడిట్ నిర్వహించాలని, మృతుల కుటుంబాలకు తగిన నష్టపరిహారం చెల్లించి దోషులపై క్రిమినల్ చర్యలు తీసుకునేలా ఆదేశాలు ఇవ్వాలని కమిషన్‌ను పిటిషనర్ కోరారు.
